Ko tembiapo ñepytyvõrã, oñembosako’íva tapichakuéra ndoikuaapypukúiva ko’ã mba’épe g̃uarã, poruhára ojuhúta ñehesa’ỹijo Guarani Paraguái Ko’ág̃a Ojeporúva Retepy (GUAPAKORE) rehegua, Paraguái Ñe’ẽnguéra Sãmbyhyha mba’éva, ha avei tape omba’ereka hag̃ua apopyre(programa) mohendahápe.

Guarani Paraguái Ko’ág̃a Ojeporúva Retepy (GUAPAKORE) ningo jehaipy aty oúva opaichagua kuatiágui –upéicha romoñepyrũ– hetavéva guaraníme, ñe’ẽporãhaipyre térã tavarandu aty rehegua. Umi moñe’ẽrã oñembyaty poruhára ikatuhápe oguenohẽ marandu oikotevẽva ohesa’ỹijo hag̃ua ñe’ẽ, he’iséva ha oñemyesakãva ipype. Ne’ĩra ojejapopaite, upéva he’ise, ojeporukuaáma ramo jepe ko’ága oĩhaichaite, mbeguekatúpe oñembohetavéta aranduka oĩva ipype ha avei oñemoporãvéta mba’erekaha(buscador) heseguáva.

Ko apopyre ojeporu porãve hag̃ua tekotevẽ ojerereko kundahaha Firefox térã Google Chrome, upéicharamo ikatúta osẽ porãmba opamba’e ojehekáva ipype.

Ko tetepy(corpus)-pe ojeheja haipy apohára ohai haguéicha; ñe’ẽ ojáva térã ojoajúva ojoehe, upeichaite opyta. Tai g̃ añoite oñemoinge opa umi haipýpe, oñemopeteĩ hag̃ua guarani ñe’ẽ omoneĩ haguéicha Guarani Ñe’ẽ Rerekuapavẽ ary 2015 jave.

Opavavete haipy oĩva tetepy(corpus)-pe oñerenohẽ 19 aranduka imoasãimbyréva mokõipa po (25) ary ohasaramóvape, tetã Paraguái ryepýpe. Ko’ã haipyre ojehechauka ojehaihagueichaite, noĩriramo mokõi ñe’ẽme; umívagui ojepe’apaite ndaha’éiva guarani.

Ko tembiporu guasu ñe’ẽ ojehekaha oguereko mokõi ovetã tuichavéva. Peteĩhapeguápe poruhára ohekáta ñe’ẽ ohekaséva (ta’ãnga 1^ha).

Ko’a guive ojehechaukáta mba’eichaitépa ikatu oñemba’apo ko tembiporúpe.

Ta’ãnga 1^ha

.: 1 :.

Ehai pe ñe’ẽ rehekaséva pe ojehechaukahápe (tai isa’ykangývape oĩ upéva «Ehai peteĩ ñe’ẽ…»). Peteĩ ñe’ẽnte ikatu ojehai ojeheka hag̃ua. Techapyrãramo ñamoĩta akã.

.: 2 :.

Reheka hag̃ua ko ñe’ẽ, ehai pe haihápe umi mokõi tai ñepyrũguáva, ha remoĩ hag̃ua pe tai tĩguáva, ehesajopy hekahápe; upe tai ojekuaa peteĩ korápe, opaite umi tai guarani mba’etéva apytépe oĩva (ã ẽ ĩ õ ũ ỹ g̃ '), pe hekaha renda guypeve. Reikutúvo pe tai tĩgua ã, oĩmbáta pe ñe’ẽ rehaíva (ta’ãnga 2^ha).

Ta’ãnga 2^ha

.: 3 :.

Upéi ehesajopy pe «Eheka» he’ihápe, ha pe apopyvusu(sistema) ohechaukáta ndéve ovetã mokõiha, oguerútava pe mba’e jerurepy (ta’ãnga 3^ha). Upépe rehecháta opaichagua mba’ekuaarã(datos) neporandu rehegua, péicha avei opaite mba’e arandukakuéra peteĩteĩ reheguáva (ary – apohára – teratee – tetã – mba’eregua – moherakuã). Ko’ã mba’ekuaarã ojehechapaitéta remongu’évo akatúa gotyo mba’erechaha(pantalla) térã rehesajopývo kuatiarogue jepysopyrãva.

Ta’ãnga 3^ha

.: 4 :.

Reheka jey hag̃ua ñe’ẽ pyahu, ehesajopy pe «Emopotĩ» he’ihápe, upéi ehai ñe’ẽ pyahu, resẽ’ỹre ovetã peteĩhágui; hakatu upéva oĩ mba’erechaha(pantalla) opaha yvýgotyo asúpe (ta’ãnga 4^ha).

Ta’ãnga 4^ha

.: 5 :.

Ndojejuhúiramo pe ñe’ẽ rehekáva, ko apopyvusu(sistema) nemomarandúta.

.: 6 :.

Resẽte hag̃ua tembiporúgui, ehesajopy pe kurusujoivy (X) pe’aha(pestaña) ohechaukáva.